ОБЩЕСТВО

«ХИ ИРХÆФСÆН НÆУ МÆНÆН ПОЭЗИ»

Зынгæ ирон поэт, публицист, критик Бахъаты Нугзары

 

райгуырдыл æххæст кæны 91 азы

 

Ивгъуыд æнусы 50-æм азты кæрон æмæ 60-æм азты райдианы ирон литературæмæ цы курдиатджын фæлтæр æрбацыд, уыдонæй иу уыд поэт-лирик Бахъаты Ильяйы фырт Нугзар. Райгуырд Знауыры районы Бахъатыхъæуы 1934 азы, рухæны мæйы 25-æм бон. Райдайæн скъолайы ахуыр кодта сæхи хъæуы. Нугзар схъомыл уæздан æмæ хæдæфсарм хæдзары. Йæ фыд Иликъо хъæубæсты, мыггаджы ‘хсæн нымад лæг уыд йæ кæрдзындæттондзинад æмæ куырыхондзинадæй. Революцийы уылæнты аленк кодта, хайад иста Бургъустаны хæсты, уыд колхозон цардаразджыты цырв. Уæдæ Фыдыбæстæйы Стыр хæсты дæр æнцад нæ бадт, уыд Знауыры районы партизанты къордты архайæг. Йæ мад Битеты Настъа кадыл мæлгæ сылгоймаг, нæртон æфсин уыд хæдзарæн, мыггагæн, хъæубæстæн. Уыимæ – къухæй арæхстджын, хæрдгæбыдтæ æмæ тын уафынмæ – диссаг. Уыдис сын дыууæ фырты æмæ æртæ чызджы.

 

1953 азы Нугзар каст фæцис Зиулеты астæуккаг скъола æмæ ахуыр кæнынмæ бацыд Хуссар Ирыстоны паддзахадон педагогон институты ирон филологийы факультетмæ. Каст æй куы фæцис1957 азы, уæд дыууæ æмæ ссæдз азы куыста хъомылгæнæгæй. Уыд ахуыргæнæг, стæй Уилда, Уæллаг Чере, Къоркъула, Уалытыхъæу æмæ Сарабукъы 8-азон скъолаты директортæй. Уый фæстæ куыста журнал «Фидиуæг»-ы критикæ æмæ публицистикæйы хайады редакторæй. Уыд рауагъдад «Ирыстон»-ы сæйраг редактор, стæй – йæ директор. Йæ литературон куысты æмрæнхъ ныллæууыд æхсæнадон архайдыл æмæ афтæ фæкуыста уæхскуæзæй суанг йæ амæлæты бонмæ. Фондз азы уыд Республикæ Хуссар Ирыстоны Парламенты депутат, уыимæ Ахуырад æмæ культурæйы комитеты сæрдар.

 

Ирон литературæйы йæ ном рарттывта бæстонæй 1960 азæй. Уæд фыццаг хатт арвы рухс федта йæ фыццаг æмдзæвгæты æмбырдгонд «Уалдзыгон райсом». Æниу, уæдмæ журнал «Фидиуæг» æмæ газет «Коммунист»-ы фæрстыл дзæвгар æмдзæвгæтæ ныммыхуыр кодта.

 

Фыссын сæ райдыдта, скъолайы ма куы ахуыр кодта, уæд, æмæ æппынæдзух тырныдта поэзийы сусæгдзинæдтæ рафæлгъауынмæ. Фæстæдæр уымæн загъта йæ царды нысан æвдисæгау:

 

 Хи ирхæфсæн нæу мæнæн поэзи,

 Кадæнхъæл лæгæн мæ худ нæ исын…

Не знагæн йæ марæн нæмыг фестын,

Ме ‘мбалæн та риссын æз йæ рисыл.

(«Чиныгкæсæгмæ»)

 

Дуг æмæ рæстæджы поэт уыд Нугзар. Йæ адæмы царды фæндæгтæм каст сыгъдæгзæрдæйæ, хъарыд æм кæддæриддæр лæджы хъыг, адæймаджы циндзинад. Йæ мæт, йæ цины сæр уыд Ирыстон – фыдæлты зæхх, фыдæлты уæзæг.

 

Нугзар поэт-лирик кæй у, уый фæбæрæг йæ фыццаг æмдзæвгæтæй, стæй йæ фыццаг чингуытæй: «Уалдзыгон райсом», «Ныстуан», «Æнæрынцой мелоди»-йæ, æмæ зарыд уыцы зæрдæйы уагæй. Цыбыр æмдзæвгæ фыстаид æви кадæг, уæддæр дзы уынæм, лирикон хъайтары номæй йæхи зæрдæйæ чи фæулæфы, йæхæдæг кæуыл фæриссы, уыцы сагъæс.

 

Поэт æппынæдзух зарыд Фыдыбæстæ, мадæлон æвзаг, ирон лæджы уды хъæд, нæ ивгъуыд æмæ нæ абоныл. Ирыстон ын хицæнтæ никуы уыд: «Мады риутæ дарынц къуыпп дыууæ хохау, фæлæ сæ хъæбул нæ кæны хицæнтæ» («Ирыстон»). Адджын та йын, сæрыстыр кæмæй стæм, уыцы Чермен, Хазби, Иссæ æмæ бирæ ирон хъайтартæн мадау кæй басгуыхт, йæ авдæны сæ кæй ауызта, уый тыххæй уыд.

 

Мады фæлгонц егъау бынат æрцахста Нугзары поэзийы. Йе ‘мдзæвгæтæ «Цæсты рухс», «Мад», «Амонд, курæм дæ – сауд ныл!»-ы æмæ æндæрты уынæм поэтæн йæхи мады сурæт, æмткæй Ирыстоны мадæлты фæлгонцтæ алыхуызон уавæрты.

 

Нæ бафсæст Нугзар Ирыстоны уынд, конд, йæ рæсугъддзинæдтæй. Абон, йæ 91 азы бон, хъуамæ уаид нæ фарсмæ, цæмæй йын йæ бирæ лæггæдты тыххæй зæгъиккам бузныг. Фæлæ фыссæг нæ мæлы, йæ фыстытæн кæсæг куы уа, уæд. Бахъаты Нугзар та уыд йæхирдыгон поэт. Цы дзæвгар аивадон чингуытæ йын ныффыссын бантыст – «Уарзондзинады зарджытæ», «Уæлахизхæссæг», «Фæстаг фыстæг», «Мысæн бон», «Уацмыстæ» æмæ æндæртæ, – уыдон ын ирон адæмы ‘хсæн йæ ном ферох кæнын никуы бауадздзысты.

 

Бацæттæ кодта КЪУДУХТЫ Маринæ


Похожие записи:

ОБЩЕСТВО 1.09.2022 в 10:13

Отношение к учительскому труду должно меняться

Министр просвещения Российской Федерации Сергей Кравцов, выступая в августе на Байкальском образовательном форуме, заявил, что отношение к учительскому труду должно меняться и что это ключевой принцип в работе над повышением статуса педагога.

ОБЩЕСТВО 8.12.2021 в 19:08

Северная Осетия – один из потенциальных регионов для установки уникального радиотелескопа

8 ноября совместная экспедиция Специальной астрофизической обсерватории (САО) РАН

КУЛЬТУРА 5.06.2023 в 19:25

«Счастье, что она у нас есть!»

Настоящим праздником искусства стали дни пребывания в Северной Осетии балетмейстера-репетитора балетной труппы Государственного академического Большого театра (ГАБТ) народной артистки СССР Светланы Адырхаевой. Она прибыла во Владикавказ с артистами труппы ГАБТ в рамках юбилейных торжеств в честь ее 85-летия.

ОБЩЕСТВО 29.11.2022 в 10:01

С 50-летним юбилеем!

Свой 50-летний юбилей отмечает Леонид Сасиев, кандидат педагогических наук, директор Технологического колледжа полиграфии и дизайна, а также постоянный автор, эксперт и большой друг нашей редакции.

ОБЩЕСТВО 15.01.2024 в 19:24

«Малая родина – сила России»

Владикавказ принимает участие в первом Всероссийском муниципальном форуме

ОБЩЕСТВО 23.04.2024 в 09:50

Сотрудники местного самоуправления отметили профессиональный праздник

22 апреля в АМС г. Владикавказа отметили профессиональный праздник – День местного самоуправления. Большой группе сотрудников были вручены Почетные грамоты и Благодарственные письма.

Все новости из категории: